Susan Wojcicki: క్యాన్సర్‌తో యూట్యూబ్‌ మాజీ సీఈవో మృతి.. స్పందించిన సుందర్‌ పిచాయ్‌

Susan Wojcicki: యూట్యూబ్‌ మాజీ సీఈవో సుసాన్‌ వోజ్‌కికీ ఇవాళ ఉదయం కన్నుమూశారు. ప్రస్తుతం ఆమె వయసు 56 ఏళ్లు.. సుసాన్‌ మరణవార్తను ఆమె భర్త డెన్నిస్ ట్రోపర్ సోషల్‌ మీడియా వేదికగా ధృవీకరించారు. ఈ మేరకు భావోద్వేగపూరితమైన పోస్ట్‌ పెట్టారు. రెండేళ్లుగా ఊపిరితిత్తుల క్యాన్సర్‌ తో పోరాటం చేసిన ఆమె.. ఈరోజు కుటుంబాన్ని వదిలేసి తిరిగిరాని లోకానికి వెళ్లిపోయిందంటూ తీవ్ర భావోద్వేగానికి డెన్నిస్ ట్రోపర్ గురయ్యారు.

ఇక, యూఎస్‌కు చెందిన సుసాన్ 2014 నుంచి 2023 వరకు యూట్యూబ్‌ సీఈవోగా పని చేశారు. అంతకు ముందు ఆమె గూగుల్‌లో వర్క్ చేశారు. ఈ నేపథ్యంలో సుసాన్‌ మృతిపై తీవ్ర దిగ్భ్రాం వ్యక్తం చేశారు గూగుల్ సీఈవో సుందర్ పిచాయ్.. రెండు సంవత్సరాలు క్యాన్సర్‌తో పోరాడిన తన స్నేహితురాలు మరణించడం నమ్మశక్యంగా లేదని ఆయన చెప్పుకొచ్చారు. తను ఓ అద్భుతమైన వ్యక్తి.. ఆమె లేని ఈ ప్రపంచాన్ని ఊహించడం కష్టంగా ఉంది.. కాగా, గూగుల్‌లో సుసాన్‌ కీలక వ్యక్తిగా పని చేశారు. ఇంటర్నెట్‌ను రూపొందించడంలో సుసాన్ ముఖ్యపాత్ర పోషించారు అంటూ సుందర్ పిచాయ్ వెలడించారు.