Birthright Citizenship Not For Unqualified People And Unqualified Kids: Trump

Donald Trump: అమెరికా అధ్యక్ష బాధ్యతలు తీసుకున్నప్పటి నుంచి డొనాల్డ్ ట్రంప్ జెట్ వేగంతో పనిచేస్తున్నారు. ముఖ్యంగా తాను ఎన్నికల ప్రచారంలో ఏవైతే హామీలు ఇచ్చారో, వాటిపై ఎగ్జిక్యూటివ్ ఆర్డర్లు విడుదల చేశారు. అక్రమ వలసదారుల్ని దేశం నుంచి బహిష్కరించడం, వివిధ దేశాలపై వాణిజ్య సుంకాలు పెంచడం, జన్మహక్కు(బర్త్ రైట్) పౌరసత్వాలను నిషేధిస్తూ ఆర్డర్లపై సంతకాలు చేశారు.

తాజాగా జన్మహక్కు పౌరసత్వంపై మరోసారి చర్చ ప్రారంభమైంది. జన్మహక్కు పౌరసత్వం ‘‘బానిసల పిల్లలకు ఉద్దేశించబడింది’’ అని డొనాల్డ్ ట్రంప్ స్పష్టం చేశారు. ఈ తరహా సిటిజన్‌షిప్ మొదటగా బానిసల పిల్లలకు ప్రయోజనం కోసం ఉద్దేశించబడిందని చెప్పారు. ప్రపంచవ్యాప్తంగా ఉన్న వ్యక్తులు యూఎస్ పౌరసత్వం పొందేందుకు కాదని చెప్పారు. ప్రతీ ఒక్కరు అమెరికా వస్తారు, అర్హత లేని వ్యక్తులు, అర్హత లేని పిల్లలకు ఈ జన్మహక్కు పౌరసత్వం ఉద్దేశించబడలేదని చెప్పారు. ప్రపంచం మొత్తం అమెరికాని ఆక్రమిస్తానని చూస్తే చూస్తూ ఊరుకోనని ట్రంప్ చెప్పారు.

బాధ్యతలు చేపట్టిన మొదటి రోజే, జన్మహక్కు పౌరసత్వాన్ని రద్దు చేసే లక్ష్యంతో ఒక కార్యనిర్వాహక ఉత్తర్వును జారీ చేశారు, అయితే దానిని సియాటిల్‌లోని ఫెడరల్ కోర్టు త్వరగా కొట్టివేసింది. సుప్రీం కోర్టు చివరికి తనకు అనుకూలంగా తీర్పు ఇస్తుందని ట్రంప్ విశ్వాసం వ్యక్తం చేశారు. రిపబ్లికన్ సెనేటర్లు లిండ్సే గ్రాహం, టెడ్ క్రజ్, కేటీ బ్రిట్ ట్రంప్ అభిప్రాయాలకు అనుగుణంగా ఉండే బిల్లును ప్రవేశపెట్టారు. 2025 జన్మహక్కు పౌరసత్వ చట్టం పేరుతో ప్రతిపాదించిన చట్టం, అక్రమ వలసదారులకు, తాత్కాలిక వీసాలపై వలసదారులు కాని వారికి జన్మించిన పిల్లలకు జన్మహక్కు పౌరసత్వాన్ని పరిమితం చేయడం లక్ష్యంగా పెట్టుకుంది. పిల్లాడికి పౌరసత్వం రావాలంటే తల్లిదండ్రుల్లో ఒక్కరైనా అమెరికన్ జాతీయుడైనా లేదా, చట్టబద్ధమైన శాశ్వత నివాసి లేదా అమెరికా సైన్యంలో పనిచేసి ఉండాలని నిబంధనలు పెట్టారు.